مجھے کسی نے بتایا خدا ہے میرے ساتھ
میں کیا بتاوں اسے اور کیا ہے میرے ساتھ
تجھے یقیں نہیں آئے گا پر حقیقت ہے
یہ تو نہیں ہے کوئی دوسرا ہے میرے ساتھ
یہ مشکلات بھی اب میرے ساتھ رہتی ہیں
یہ جانتی ہیں کہ مشکل کشا ہے میرے ساتھ
میں کیا بتاوں تجھے، یاد کیا دلاوں تجھے
تو جانتا ہے جو تو نے کیا ہے میرے ساتھ
اگر وفا کو بتاوں، وفا بھی چیخ پڑے
وفا کے نام پہ جو کچھ ہوا ہے میرے ساتھ
ستم تو یہ ہے کہ میں نے اسے بھی چھوڑ دیا
جو سب کو چھوڑ کے تنہا کھڑا ہے میرے ساتھ
کسی سے کوئی شکایت نہیں مجھے مومن
جو ہونا چاہیے وہ ہورہا ہے میرے ساتھ
